Курсевите се организираат во согласност со индивидуалните потреби на странските деловни луѓе активно вклучени во дипломатијата и деловното работење. Ваквиот начин на изучување на јазикот е широко применлив и со задоволство прифатен од бројни странски претставници во Македонија.

Курсевите се разработени за слушатели кои бараат брз напредок, но и детално воведување во сите аспекти и особености на македонскиот јазик. Во Логос Оксфорд ги користиме учебникот и работната тетратка "Добре дојдовте на македонски јазик" од Виолета Ајдинска- Папазовска, издание на Работнички универзитет "Кочо Рацин" Скопје.

Наставните материјали се кратки, интензивни и полни со предизвици. Сите области се грижливо разработени, се утврдуваат и се применуваат во најразлични контексти и ситуации.

Напредокот на слушателите се надгледува преку разновидни усни и писмени тестови и секогаш кога ќе се појави проблем, на слушателите им се нудат дополнителни часови за консултации.